حجات مش حتعرفها او تعرفيها غير بعد الجواز
بسم الله الرحمن الرحيم .
.
في حاجات مش هتعرفها غير وانت متجوز... !!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا مش اللي في دماغك عشان دا كل الناس عرفاه. انك تبقى قاعد بتشرب كباية شاي وتلاقيها عاملة نسكافية لنفسها فتروح واخده منها وتشرب الاتنين. وتقولك بألف هنا يا حبيبي وتعمل واحد تاني.. لما تحلق دقنك تلاقي حد يحطلك افتر شيف وانت قاعد تقرأ الجورنال.. قلمك اليوني بول الاسود مش هيضيع كل ربع ساعة. دايما في شور جيل ريحته حلوة في الحمام. هتلاقي حد تديله شرباتك القديمة. المرة الوحيدة اللي هتحس بنشوة النصر في كل الالعاب ابتداءً من الكوتشينة والطاولة والشطرنج مرورا بخبط الكورة في الحيطة بمهارة وتديها كباري.. وطبعا هتطبق كل حركات الاستاذ ممدوح فرج في المصارعة عليها؛ الدي دي تي والسوفلكس والتروكي. هتلاقي حد يطبلك.. حقيقي الست بتاعتك لما تحبك وتطبلك هتحس انك اجدع من يوليوس قيصر.. مش هتعوز حاجة تانية في الدنيا. مش هيهمك اللي بيكسر عليك وانت سايق أو اللي بيكرهك في الشغل أو المرتب المتأخر.. سندوتش الجبنة في الفطار هيجيلك اربع تربع على طبق حواليه قطعتين زيتون وشرايح خيار وفنجان قهوة بوش.. مش رغيف تاكله وانت قاعد في التلاجة زي كلب البحر. هتلاقي حد تعمل فيه مقالب وتخوفه وتستمتع بتمسحه يتحامى فيك.. كل مرة هتسقف جامد وهي بتحط فيشة السخان فتتفزع هي وتفتكر ماس.. وتفضل تشتم فيك وانت عمال تضحك زي الاهبل في الصالة. وفجأة تسمع صويت في المطبخ تجري عليها، تلاقيها واقفة في ركن المطبخ خايفة من خنفسة على الحيطة.. فتمسك الشبشب كأنك هانيبال الافريقي الذي دوخ جيوش الرومان، وتقضي على الخنفسة بضربة واحدة، فتيجي تشدك من كمك في امتنان، فتحس انك قمت بانتصار يفوق سقنن رع في مواجهة الهكسوس أو رمسيس الثاني في معركة قادش. وكل ما تبدأ هي دايت تروح تشتري نص دستة جاتوه من مونجيني وتقعدوا تحتفلوا بالدايت سوا.. وليحيا الكرش.. وتقولها يا حبيبتي شكلك كدة حلو.. دايت ايه وخيبة ايه الست المصرية الرقيقة لازم تكون عريضة المنكبين واسعة المجانص وعندها رباط صليبي.
ليست هناك تعليقات:
إرسال تعليق